Fútin biður um umbering fyri málburð

Michael Boolsen, fúti, biður nú um umbering fyri málburðin í einum svari hjá løgregluni til Tórshavnar býráð, í sambandi við málið um seta skeltir upp, sum banna lastbilakoyring á náttartíð.

"Hvørki málburður ella innihald endurspegla tey virðir, løgreglan í Føroyum stendur fyri. Vit vilja hava eitt gott, konstruktivt og eitt virðiligt samstarv við øll í Føroyum, privatfólk og fyritøkur og myndugleikar. Tað fara vit sjálvandi at leggja okkum eftir", sigur Michael Boolsen.

Í einum innliti, sum Kringvarpið hevur fingið, sæst, at ein løgreglumaður er ikki nøgdur við framferðina hjá Heðini Mortensen, borgarstjóra, í málinum.  

"Í tey 13 árini, eg havi verið limur í ferðslunevndini, havi eg aldrin upplivað at vera so skitin niður eftir rygginum, sum eg eri blivin av Heðini Mortensen", sæst millum annað í svarinum.