Áralong bíðitíð til útgreinan

Tað tekur umleið hálvt annað ár at sleppa á psykiatriska depilin til greiningar fyri millum annað ADHD. Skal tíðin styttast, eru krøvini næstan ómenniskjalig.

Niels Kristian Lisberg ótolnast. Fimm ára gamli sonurin skal bíða í 16-17 mánaðir eftir at fáa eina útgreinan.

Georg L. Petersen

Jón Brian Hvidtfeldt

12.10.2021 - 19:46

Foreldrini hjá fimm ára gamla Hans Andriasi vita ikki, hvat honum bagir. Hevur hann ADHD, asperger, autismu - tey vita tað ikki. Og útlitini fyri at fáa eina útgreining og diagnosu eru ikki góð. Bíðitíðin til útgreinan er í løtuni 16-17 mánaðir.

Fekk Hans Andrias eina útgreining og diagnosu, so letur ein heimur við tilboðum seg upp við heimaráðgeving, umlætting, stuðul til sálarfrøðing, heilivág, serligt skúlatilboð og mangt annað. Inntil tá eru tey latin upp til at gera sum frægast.

Í innslagnum tosa vit við pápan, Niels Kristian Lisberg, og forkvinnuna í ADHD-felagnum, Bjørg Dam.

Súsanna Reinert Petersen, serlækni í barna- og ungdómspsykiatri, vitjaði í sjónvarpsstovuni.