Blóðroynd kann nú staðfesta um krabbameinið er komið aftur

Blóðið hjá krabbameinssjúklingum kann siga heilt nógv um vavið og gongdina á sjúkuni.

Smá krabbameins-dna eru í blóðnum, sum ferðast runt í kroppinum.

Granskarar eru komnir rættiliga langt við at brúka hesa vitanina í viðgerðarroyndum ymsastaðni í Danmark.

Annarhvør krabbameinssjúklingur gerst sjúkur aftur eftir skurðviðgerð og kemoviðgerð. Tað eru hesi fólkini, sum kunnu finnast nógv skjótari við eini einfaldari blóðroynd. Við eini blóðroynd verður ikki neyðugt at bíða í mánaðir ella ár eftir at verða skannað, sum síðan kann vísa, um krabbameinið er komið aftur ella ikki.

Kåre Andersson Gotschalck, yvirlækni á skurðdeildini í Horsens og kliniskur lektor við Aarhus Universitet, sigur, at um hetta verður mátin frameftir, er talan um eitt veruligt paradigmuskifti í krabbameinsviðgerð í Danmark.

"Hetta broytir hugsanarháttin viðvíkjandi krabbameini. Fyri sjúklingar kann hetta merkja, at viðgerðin verður meira miðvís og úrslitagóð," sigur Kåre Andersson Gotschalck við DR.dk.