FM við Djúpumýru: ballaðust, sum var tað í 99

Tað var 22 ár síðan seinast.

Í 1999 vunnu Tony Paris, Kurt Mørkøre, Rógvi Jacobsen og allir hinir føroyameistaraheitið við at vinna 4-1 á fuglfirðingum á síðsta leikdegi.

Ta ferðina var áarføri, og vøllurin stóð undir í vatni. Leygardagin var stilt, turt og kalt og stóð í andsøgn við minniliga dagin beint fyri aldarskiftið. 

B36 hótti eina løtu við aftur at útseta FM-veitsluna, sum klaksvíkingar hava bíða eftir í fleiri vikur. 

 - Tað hevði verið snópisligt, um vit ikki vunnu, segði Mikkjal Thomassen.

Fyri steðgin spældi KÍ 'við hondbremsuni uppi', sum onkur orðaði seg, men eftir steðgin varð hon slept, og ferð kom á KÍ-tokið. 

Páll Klettskarð, sum hevur kappast við Bob Sumareh um spælitíð í ár, var har, sum hann trívist best; Í málteiginum í stórdystunum, og skoraði við fóti og høvdi. 

Í evstu løtu gjørdi Jonn Johannesen, sum hann plagar, tá hann sleppur á vøllin, og so kundi gullveitslan byrja undir ljóskastarunum og afturvið hvøllu brestunum av fýrverki. 

19. føroyameistaraheitið hjá KÍ var veruleiki, og kanska er hetta tað mest uppiborna av teimum øllum. 

KÍ-B36 (við Djúpumýru)
0-1 Andrass Johansen, 6 min.
1-1 Páll Klettskarð, 63 min.
2-1 Páll Klettskarð, 75 min.
3-1 Jonn Johannesen, 90+7 min.