Grønlendska landstingið sigur nei til uran

Grønlendska landstingið samtykti í gjár at seta bann fyri forkanningum, kanningum og grevstri eftir urani.

Orðaskiftið í grønlendska tinginum vardi í tríggjar tímar, áðrenn uppskotið um at seta bann varð samtykt við 11 atkvøðum fyri og 9 atkvøðum ímóti.

Grønlendski stjórnarflokkurin, IA, legði í valstríðnum fyrr í ár stóran dent á, at tað skuldi ikki verða loyvt at útvinna uran, og sostatt hevur flokkurin nú hildið sítt vallyfti.

Eitt uppskot um at senda spurningin út til fólkaatkvøðu fall, skrivar Sermitsiaq.