Innflutningurin setur aftur met

Føroyski innflutningurin hevur sett met annan mánaðin á rað.

Tað skrivar Hagstovan á síni heimasíðu, nú innflutningurin til og við september í ár er gjørdur upp.

Tilsamans hava vit innflutt fyri 6,5 milliardir krónur higartil í ár. Vøksturin er 8,9% í mun til í fjør. Um skip og flogfør ikki verða tikin við, er vøksturin 11,6 prosent, skrivar Hagstovan.

Oljuprísurin er hækkaður nógv seinastu tíðina, og hetta sæst eisini aftur í innflutninginum. Hóast eitt sindur minni er innflutt, so hava vit brúkt 35 prosent meiri upp á brennievni higartil í ár samanborið við í fjør.

Størsti vøksturin er í bólkinum maskinur og onnur útgerð til vinnuna. Har er innflutt fyri 207 milliónir krónur meira, og vøksturin er 38 prosent.