ÍSF missir inntøkur fyri tvær milliónir krónur næsta ár

ÍSF fær tvær milliónir krónur minni næsta ár, sum støðan nú er.

Í fíggjarlógaruppskotinum eru 50.000 krónur minni til ÍSF enn í ár.

Og útlutanin frá Ítróttavedding minkar tvær milliónir.

Vedda minni

Minni verður veddað í Føroyum, og eingin stórur vinningur er vunnin í Føroyum í 2021.

Tað hevur Fíggjarnevndin hjá løgtinginum fingið at vita frá ÍSF, sum hevur biðið um minst tvær milliónir krónur aftrat næsta ár.

Stuðulin, sum ÍSF fær, verður býttur millum sersambondini.

Tey fáa í miðal 16 prosent minni næsta ár enn í ár, um játtanin ikki hækkar, sigur ÍSF.

Minkingin er størst hjá teimum stóru sambondunum, til dømis fær handbólturin 26 prosent minni og flogbólturin 30 prosent minni.