Forskúli setast á stovn í Kaldbak

Tórshavnar býráð samtykti einmælt í gjárkvøldið at játta umsókn úr Kaldbak og søkja Uttanríkis- og Mentamálaráðið um loyvi at seta á stovn forskúlalíknandi tilboð í Kaldbaks skúla frá skúlaárinum 2022/23.

Málið skal leggjast fyri aftur býráðið í vár við tilmæli um fígging.

Fyrstilærarin í Kaldbaks skúla og dagstovnaleiðarin á Flatnagarði sendu 18.november Tórshavnar kommunu umsókn um fígging til forskúlalíknandi tilboð í Kaldbak. 

Góðar royndir úr Nólsoy

Støði skal takast í royndunum hjá Nólsoyar skúla og Látrinum, sum hava slíkt tilboð.

Sum er hevur verið vanligt, at elsti bólkur í barnagarðinum vitjar í skúlanum nakrar ferðir. 

Vanligt hevur tá verið, at hesi børn vitja í ein tíma hjá fyrsta, øðrum og triðja flokki. 

12,5 tímar um vikuna

Søkt verður um 12,5 tímar um vikuna til skúlan í Kaldbak. 

Í umsóknini stendur, at skúlastýrið og foreldraráðið taka undir við skrivinum um forskúlalíknandi tilboð í Kaldbaks skúla.

Seks børn eru í Kaldbak, sum hava aldur at fara í forskúla næsta skúlaár.