Hægsti oljuprísur í sjey ár

Oljuprísurin hevur ikki verið so høgur seinastu sjey árini, sum hann er nú.

Greinarar siga seg rokna við, at prísurin fer at halda fram at hækka, tí óvist er, um nóg mikið av olju verður í summar, tá eftirspurningurin er størstur.

Víst verður eisini á, at so lítið av olju hevur ikki verið á goymslu í fleiri ár.

Fríggjakvøldið var ein tunna av olju úr Norðsjónum seld fyri 86,45 dollarar, og tað er tað mesta síðani í oktober í 2014.

Tá var prísurin eitt skifti 115 dollarar fyri tunnuna.

Nú verður mett, at amerikansku oljugoymslurnar eru tær minstu seinastu fimm árini, og tí verður roknað við, at oljuprísurin fer at hækka uppaftur meir.

Spenta støðan hækkar prísin

Fleiri staðni í heiminum er støðan óstøðug, og kreppa er í Kasakstan, og millum Rusland og Ukraina. Tað kann eisini ávirka prísin.

Samstundis setur prísurin á gassi met, og tí er ikki óvist, at tað eisini fer at ávirka oljuprísin, so hann hækkar, er metingin.

Í juni í 2014 setti oljuprísurin met, men stutt eftir rapaði prísurin, tí útboðið av skiferolju úr USA tók dik á seg.

Tað vænta greinarar ikki fer at henda aftur, tí nú samstarva fleiri oljulond við OPEC, og samstarvið vísir seg at virka væl, skrivar Dagens Næringsliv.