Ísland herðir koronutiltøkini

Íslendska stjórnin herðir koronuavmarkingarnar, tí landið er hart rakt av fjórðu bylgju av koronu í løtuni. Avmarkingarnar eru fyribils galdandi til 2. februar.

Millum annað sleppa bara 10 fólk at savnast. Skeinkistøð og náttarlívið verða stongd, men tey, sum selja mat, sleppa at hava opið undir ávísum treytum.

Fyribils raka koronuavmarkingarnar ikki skúlar og frítíðartilboð ella ferðandi til og frá Íslandi. 

Sjúkrahúsið í kreppu

Tað er serliga íslendska heilsuverkið, ið er undir stórum trýsti. Sjúkrahúsið í Reykjavík, Landspítalinn, hevur fingið fleiri starvsfólk til arbeiðis av Akureyri, frá tilbúgvingini og smærri viðtalum kring landið.

- Sjúkrahúsið er í kreppu. Fleiri starvsfólk og fleiri sengur eru á veg, sigur heilsumálaráðharrin, Willum Þór Þórsson, við RUV. 

Stjórin á sjúkrahúsinum í Reykjavík sigur, at ein stórur partur av heilsustarvsfólkunum eru heima sjúk, og teimum tørvar 200 sjúkrarøktarfrøðingar afturat, fyri at tamarhald aftur skal vera á støðuni. 

Margháttlig støða

Sambært forsætismálaráðharranum, Katríni Jakobsdóttir, er støðan margháttlig. Omikron-frábrigdið smittar sera illa, men hóast fólk gerast minni sjúk, eru heilsuverkið og starvsfólkini har hart rakt av koronu.

Stjórnin fyrireikar nú fíggjarligan stuðul til tey, ið missa inntøku av nýggjastu koronuavmarkingunum.

9.671 fólk eru smittað við koronu í Íslandi. Av teimum liggja átta á intensivari deild.