Samráðast um kvinnudystir millum H71 og Galychank

H71 er í samráðingum við ukrainska kvinnuliðið Galychank, hvar dystirnir millum H71-kvinnurnar og ukrainska liðið skulu spælast.

H71 hevur sett ynski fram um at spæla báðar dystirnar í Føroyum, men ukrainska liðið vil hava minst annan dystin í býnum Lviv í har vesturi í Ukraina.

Tað sigur Anna Dam, forkvinna í H71.

Støða takast 25. januar

Tað dregur út við at finna semju, tí týsdagin 25. januar skal støða verða tikin til, hvar dystirnir verða spældir. Og sum nú er, er mest líkt til, at annar dysturin verður spældur í Ukraina og hin í Føroyum, sigur hon.

Talan er um fjórðingsfinalu. Fyrri dysturin skal spælast 12. ella 13. februar og seinni dysturin vikuskiftið eftir, 18. ella 19. februar.

H71 hevur spurt seg fyri hjá Europeiska Hondbóltssambandinum um støðuna í Ukraina, tí hon tykist at vera ótrygg.

Eingin vandi

Boðini eru, at býurin Lviv liggur í vestara parti av Ukraina, og tískil langt frá eystara partinum, har størst ósemja er. Tí heldur EHF ikki, at nakar vandi er á ferð, sigur Anna Dam.

Talan er um eitt søguligt avrik hjá hoyvíkingskvinnum. Ongantíð fyrr hevur eitt føroyskt hondbóltsfelag vunnið seg víðari millum seinastu átta liðini í evropeiskari kapping.