Vilja ikki lækka aldursmarkið at brúka talgilda samleikan

Fíggjarnevndin hjá løgtinginum vil ikki lækka aldursmarkið fyri at fáa talgilda samleikan úr 15 árum niður í 13 ár.

Uppskotið um lækkingina kemur annars úr Fíggjarmálaráðnum.

Fíggjarnevndin heldur, at verður aldursmarkið lækkað, fara tænastuveitarar at brúka talgilda eyðmerking og samskifti yvir ein kamb til børn niður í 13 ár, hóast ivaleyst nøkur børn fáa gleði av, at aldursmarkið verður lækkað.

Tað er ikki gagnligt, sigur Fíggjarnevndin.

Hon heldur, at foreldur eiga at umsita og hava innlit í bankakontur og peningalig viðurskifti hjá børnum, sum eru 13 ella 14 ár.