Russland tveitt úr ICES

Russland er útihýst úr altjóða havgranskingarstovninum, ICES.

Geir Huse, granskingarstjóri á norska havgranskingarstovninum, HI, er annar av norsku limunum í ICES-ráðnum, sum tók undir við avgerðini at útihýsa øllum umboðum fyri Russland á øllum ICES-fundum. 

Hann harmast um støðuna.

- Vit vóna, at hetta varar í stutta tíð. Nú ræður um at finna góðar loysnir, hvussu vit kunnu gera stovnsmetingar og ráðgeva um kvotur fyri stovnarnar, sum vit og Russland hava í felag í Barentshavinum.

Kvotutilmælini eru grundarlagið fyri burðardyggum fiskiskapi, burðardyggum stovnum og vistskipanum norðanfyri. Tí skulu vit loysa hesa støðuna nú og upp í longdini, sigur Geir Huse í fráboðan frá Havgranskingarstovninum.