Skal hitta Putin og Zelenskyj

Guterres flýgur týsdagin í næstu viku til russiska høvuðsstaðin at hitta bæði russiska forsetan, Vladimir Putin, og uttanríkisráðharran, Sergei Lavrov.

Sambært talsmanninum hjá ST, Eri Kaneko, vónar António Guterres, at teir fáa umrøtt møguleikarnar fyri at fáa frið í lag í Ukraina.

Úr Russlandi fer aðalskrivarin hjá ST til ukrainska høvuðsstaðnum, Kyiv, har hann skal hitta ukrainska forsetan, Volodymyr Zelenskyj, og uttanríkisráðharran, Dmytro Kuleba. 

Aðalskrivarin hevur áður sagt, at russiska innrásin í Ukraina er størsta álopið á eitt evropeiskt land, síðan seinna veraldarbardaga.

Eitt av málunum hjá Guterres í Ukraina verður at umrøða ringu støðuna í landinum, har minst 12 milliónir ukrainar í løtuni hava tørv á humaniterari hjálp, skrivar Reuters.