Menn sessast í flestu sessirnar

Kvinnurnar settu seg á 57 av teimum 206 bý- og bygdarráðssessunum, ið vórðu vald í gjárkvøldið.

 

Hetta svarar til eina kvinnuliga umboðan upp á 27,7 prosent.

 

Bert í einari kommunu - Skálavíkar kommunu - eru kvinnurnar í meiriluta.

 

Í fýra kommunum varð ongin kvinna vald inn. Størst av teimum er Sands kommuna, har allir sjey bygdaráðslimirnir eru menn. Hinar kommunurnar við reinari mannligari umboðan eru Viðareiði, Hvalba og Sumba.

 

Í tveimum av teimum størstu kommununum, Tórshavn og Klaksvík, er javnstøðan so tætt hon kann koma, í Havn eru 6 kvinnur og 7 menn og í Klaksvík eru 5 kvinnur og 6 menn.

 

Í triðstørstu kommununi hinvegin, Runavíkar kommunu, er bert ein kvinna og 10 menn.

 

Í 12 kommunum afturat Tórshavn og Klaksvík eru menninir í minst møguligum meiriluta. Í Vestmanna, Kvívík og Tvøroyri eru 3 kvinnur og 4 menn.

 

Í Hvannasundi, Kunoy, Skopun, Húsavík, Hov og Famjin eru tvær kvinnur og 3 menn. Og í Fugloy, Húsum og Skúvoy eru 1 kvinna og 2 menn.

 

Í øllum hinum kommununum eru menninir í stórum meiriluta.