Klaksvíkingur vann slagið um Norðoyggjar

 - Vit ætla at svara aftur, men eg vænti ein harðan róður. 

Tað segði Brandur Kjølbro á Klaksvíkingi undan 10-mannafarsróðrinum á eystanstevnu leygardagin.

Avbjóðarin hjá føroyamiestarabátinum úr Klaksvík, Norðingur, tók sigurin á norðoyastevnu, og tað hóvaði sjálvsagt ikki Klaksvíkingi at missa sigurin á hiemasjógvi.

Og aftursvari kom á Skálafirði. Klaksvíkingur, sum hevði gjørt eina útskifting síðan síðst, róði ein frálíkan róður, vann við eini góðari bátslong og setti nýtt met á hesum 1000-metra málinum.

 - Kenslan er øgiliga góð, og hon er uppaftur betri, tí vit taptu seinast og komu afturí aftur, segði Brandur Kjølbro eftir sigurin.

 - Seinast var tað nokkso javnt, men vit vistu at vit høvdu meir í okkum.

Nýggja mettíðin hjá Klaksvíkingi er 4.32.25. Norðingur endaði á øðrum plássi, Havnarbáturin gjørdist nummar trý og Eysturoyingur endaði aftastur.