Fegnast um, at Ukraina hevur biðið um ES-limaskap

Stundin er komin til, at evropeisku londini í verki vísa, at virði sum friður, fólkaræði og rættvísi ikki bara eru orð.

Tað legði danski forsætisráðharrin, Mette Frederiksen, áherðslu á, tá hon í dag helt røðu fyri lóggávutinginum í Ukraina.

Av trygdarávum var tað hildið loyniligt, at Mette Frederiksen skuldi halda røðu í lóggávutinginum í Ukraina.

Í røðuni segði danski forsætisráðharrin, at hon fegnast um, at Ukraina hevur søkt um limaskap í Evropasamveldinum.

Putin ikki ímóti

Russiski forsetin, Vladimir Putin, setur seg ikki upp ímóti ukrainska ES-limaskapinum, men tað fer at hava sín kostnað, sigur hann.

Fleiri valdmikil lond í Evropa stuðla umsóknini hjá Ukraina, teirra millum Týskland, Frakland, Italia og Rumenia.

Mette Frederiksen er tann fjórði stjórnarleiðarin, sum heldur røðu fyri lóggávutinginum í landinum, síðani russisku innrásina 24. februar.

Hinir tríggir stjórnarleiðararnir eru hollendski forsætisráðharrin, Mark Rutte, pólski Mateusz Morawiecki, og bretski forsætisráðharrin, Boris Johnson.