Mæla til at ákæra skiparan á Vesturbúgvanum

Sjóvinnustýrið fer at mæla ákæruvaldinum til at ákæra skiparin á trolaranum, Vesturbúgvanum, fyri brot á millum annað vaktarhaldskunngerðina.

Skiparin á Vesturbúgvanum sovnaði, tá skip hansara var á samanstoytskós og rendi á Eysturbúgvan, sum sakk.

At skiparin svav er tað sama sum, at eingin var á brúnni.

Hann hevði sovið ov lítið undanfarnu dagarnar, tá Vesturbúgvin var á skipasmiðju, tí tøkniligir trupulleikar vóru og soleiðis, sum vaktarhaldið var skipað.

Ávaringin á brúnni, sum skal siga frá í tílíkum førum, var ikki tendrað.

Tað er niðurstøðan hjá donsku skaðanevndini, Den Maritime Havarikommission, sum kannaði óhappið tíðliga um morgunin 14. apríl, skírisdag, tá partrolararnir Vesturbúgvin og Eysturbúgvin stoyttu saman.

Eysturbúgvin og Vesturbúgvin og samanstoytur

Vesturbúgvin rendi á Eysturbúgvan skírisdag, tá teir partrolaðu 120 fjórðingar úr Føroyum.

Allir vóru bjargaðir

Hans Johannes á Brúgv, stjóri í Sjóvinnustýrinum, sigur, at brotini eru nøkur. Skiparin hevði ikki fingið nóg nógvan svøvn, eingin var á brúnni at halda vakt, og brúgvavakstalarmurin var sløktur.

Óhappið hendi í ein útsynning sunnan, 120 fjórðingar úr Føroyum.

Allir sjey menninir á Eysturbúgvanum vóru bjargaðir umborð á Vesturbúgvan.

Óhappið hendi, tá skipini, sum partrolaðu, skuldu knýta bæði skipini í trolið.