11 milliardir krónur í eyka krígshjálp til Ukraina

Umboð fyri 26 lond hava í dag luttikið á ráðstevnu á Christiansborg í Keypmannahavn, har niðurstøðan bleiv, at tey 26 londini hava játtað seg til at lata Ukraina 11 milliardir krónur afturat í krígshjálp. 

Parturin hjá Danmark verður 820 milliónir krónur, sum fer til vápn og venjing av herinum í Ukraina. 

Samlaða danska krígshjálpin til Ukraina er nú komin upp á tríggjar milliardir krónur.

Ukraina ráðstevna, Christiansborg

Ukraina fær ikki hernaðarflogfør

Hóast tey 26 londini eru sinnað at hjálpa Ukraina fíggjarliga, so fær Ukraina ikki alt, ið landið biður um. 

Eitt nú hevur Ukraina biðið um framkomin hernaðarflogfør, sum kunnu niðurberja russiska flogvápnið, men hetta hevur Ukraina ikki fingið játtað.

Eisini eru ávís sløg av raktettum, sum biðið er um, men sum tey 26 londini ikki eru sinnað at lata Ukraina. 

Ukraina ráðstevna, Christiansborg

"Útihýsið russum"

Ukrainski forsetin, Volodymyr Zelenskyj, heitti í sínari setanartalu á ráðstevnuni á Christiansborg á tey 26 londini um at útihýsa russiskum statsborgarum. 

Danski uttanríkisráðharrin, Jeppe Kofod, var ikki avvísandi fyri hugskotinum, og tað eru tað fleiri umboð fyri onnur lond, sum heldur ikki eru.

Týski kanslarin, Olaf Scholz, var hinvegin ímóti hugskotinum. Hann kallaði kríggið fyri "Kríggið hjá Putin" og gjørdi vart við, at hann helt ikki, at tað skal ganga út yvir allar russar, at Putin kríggjast við Ukraina. 

Hetta var ukrainski uttanríkisráðharrin, Dmytro Kulba, eyðsæð ósamdur við týskan kanslaranum í. Tað gjørdi hann vart við á Twitter. 

This is Russia’s, not just Putin’s war. Not Putin, but actual Russian soldiers come from Russia to kill, torture and destroy. Russians overwhelmingly support the war, cheer missile strikes on Ukrainian cities and murder of Ukrainians. Let Russian tourists enjoy Russia then.

— Dmytro Kuleba (@DmytroKuleba) August 11, 2022

"Tað er Russland, og ikki bara Putin, ið hevur lopið á Ukraina. Størsti parturin av russum stuðla krígnum og fegnast um rakettálop á ukrainskar býir," skrivar Kulba millum annað á Twitter.