Runavíkar kommuna fær álvarsliga átalu

Umboðsmaðurin hevur viðgjørt eina klagu um vantandi svar frá Runavíkar kommunu í sambandi við umsókn um byggiloyvi til neyst. 

Klagarin søkti í mars 2021 um byggiloyvi til neyst, men hevði í mai 2022 framvegis ikki fingið svar frá Runavíkar kommunu.

Runavíkar kommuna greiddi frá, at Byggi- og býarskipanarnevndin og Vinnu- og havnarnevndin høvdu samtykt á fundi í mars 2020 at endurskoða reglurnar fyri neystabygging, og at arbeiðið var ikki komið á mál. 

Tí vóru umsóknir um byggiloyvir til neyst lagdar í bíðistøðu. Hetta hevði Runavíkar kommuna ikki kunnað klagaran um.

13 umsóknir í bíðistøðu

Sambært Runavíkar kommunu lógu 13 umsóknir um byggiloyvi til neyst í bíðistøðu, íroknað umsóknina hjá klagaranum. 

Tveir umsøkjarar høvdu hvørki fingið móttøkuváttan ella kunning um bíðistøðuna, og tveir høvdu fingið noktandi svar, vísandi til endurskoðan av byggisamtyktini, men kortini stóðu umsóknirnar hjá hesum báðum eisini í bíðistøðu. 

Fýra av umsøkjarunum høvdu sent kommununi áminningar, men ikki fingið svar.

Umboðsmaðurin helt hetta als ikki vera nøktandi og átalaði Runavíkar kommunu fyri ikki at hava svarað og kunnað klagaran um orsøkina til bíðistøðuna, og nær svar kundi væntast. Onkur umsókn hevur ligið uttan viðgerð síðani 2020.

Hanna Vang, løgtingsins umboðsmaður

Hanna Vang er Løgtingsins umboðsmaður.

Løgting og landsstýri kunnað

Samanumtikið gav umboðsmaðurin Runavíkar kommunu álvarsliga átalu fyri handfaringina av umsóknunum um byggiloyvi til neyst og mælti Runavíkar kommunu til at endurskoða mannagongdir sínar í sambandi við byggimálsviðgerð.

Av tí at umboðsmaðurin helt talan vera um, at álvarslig mistøk vóru framd í hesum máli, kunnaði hon formansskapin í Løgtinginum, løgmann og landsstýrismannin í kommunumálum um málið.