Leita eftir útlendskari kvinnu í Vágum

Leitað verður í løtuni eftir einari útlendskari kvinnu, miðskeiðis í 30-unum, sum hvarv við Trælanípuna, Teistarók og Rivurnar í morgun.

Leitað verður bæði við báti og dronum, og bjargingarlið leita á landi. Fyrr í dag leitaði ein tyrla eisini, men hon mátti fara aftur í rutuflúgving, og tí vóru dronur tiknar í nýtslu.

Vakthavandi á løgreglustøðini í Havn sigur, at  kvinnan fór í hagan saman við manni sínum um hálvgum sjey tíðina í morgun at síggja sólina rísa. Um 10-tíðina fyrrapartin boðaði maðurin billettsøluni har á leið frá, at kona hansara var horvin, og so fór stór leiting í gongd.

Løgreglan veit ikki, um kvinnan er dottin oman, ella hon horvin á landi.

Fólk, sum ikki eru partur av leitingini, verða biðin um at halda seg burtur frá økjunum, har leitað verður.

--

Dagføring klokkan 17.00

Kvinnan, sum hvarv við Trælanípuna í Vágum ella har á leið í morgun, er framvegis ikki funnin.

Vakthavandi á løgreglustøðini sigur, at bjargingarlið, løgregla, hundar, tyrla, dronur og bæði Sverri og Brimil hava leitað, men einki funnið. Leitað hevur verið á sjógvi og landi. Eisini fólk, sum hava verið á fjalli, hava leitað í tann mun, tað bar til.

Tað var í morgun um hálvgum sjey-tíðina, at eitt útlendsk par var farið til gongu ímóti Trælanípuni. Stutt fyri klokkan tíggju kom maðurin aftur til gjaldstøðina við Leitisvatn og boðaði frá, at kona hansara var horvin.

Talan er um eina kvinnu miðskeiðis í 30.árunum úr Kina og ein mann úr Hollandi, sum búgva í Týsklandi.

Hvussu leingi leitað verður afturat, visti vakthavandi ikki at siga.