Fleiri skulu brúka Bygdaleiðir

Næsta vár fara Strandfaraskip landsins at gera átøk, sum skulu fáa fleiri fólk at brúka Bygdaleiðir.

Tað sigur Uni Rasmussen, landsstýrismaður, í svari til Helga  Abrahamsen, løgtingsmann, sum spyr um almennu bussleiðirnar. 

Uni Rasmussen sigur, at ferðafólkatalið minkaði sera nógv, meðan korona var.

Í 2020 vóru bara 320.000 ferðafólk.

40 bussar og 24 farleiðir

Í ár vænta Strandfaraskip landsins, at 510.000 fólk fara at brúka Bygdaleiðir.

40 bussar eru, 24 farleiðir og 1.500 fráferðir um vikuna. 

Strandfaraskip landsins hava samstarv við Visit Faroe Islands, onnur, sum fáast við ferðavinnu, kommunur og fólk yvirhøvur um koyringina hjá Bygdaleiðum.

Ætlanin er at fáa fleiri snartúrar millum norðurøkið og Suðurstreym gjøgnum Eysturoyartunnilin, sigur Uni Rasmussen í svarinum.