Hava innflutt fyri góðar átta milliardir í ár

Fyrstu átta mánaðirnar í ár hava føroyingar innflutt vørur fyri metstórar upphæddir.

Virðið á innflutninginum hesar mánaðirnar er 8,3 milliardir krónur, og tað eru 43 prosent meira enn sama tíðarskeið í fjør, sum eisini var metár.

Um skip og flogfør ikki verða tikin við, er vøksturin 27 prosent. 

Prísurin á brennievni nærum tvífaldaður

Prísvøksturin á brennievni og øðrum vørum er ein av orsøkunum til stóra vøksturin. Tí hóast innflutta nøgdin av brennievni minkaði sjey prosent, er innflutningurin - gjørdur upp í prísum - vaksin meira enn 90 prosent samanborið við í fjør. 

Talan er eisini um stóran vøkstur í øðrum vørubólkum. Innflutningurin í bólkinum "rávøra til fiskavirking" er vaksin 50 prosent, ella 165 milliónir krónum, meðan innflutningurin av tilfari til hav- og landbúnað er vaksin 30 prosent.