- Tíðindi, mentan og ítróttur
VIDEO: Spískamarið vil vísa á møguleikarnar í føroyskum landbúnaði
So verður sonn matgleði aftur at síggja í sjónvarpinum.
Nýggir partar av sjónvarpsrøðini "Spískamarið" eru gjørdir, og fyrsti partur verður sendur í kvøld.
Hendan sesongin av "Spískamarinum" hevur fingið undirheitið "í bø eg gangi".
"Málið er at varpa ljós á føroyskan landbúnað, og vísa á teir møguleikar, sum liggja í landbúnaðinum," sigur Gutti Winther, kokkur og vertur í "Spískamarinum".
Kúgvin
Fyrsti parturin av fýra, sum verður vístur í kvøld, ber heitið "Kúgvin" og viðger týdningin, ið kúgvin hevur havt fyri føroyingar.
Gutti Winther vitjar Sigert Patursson, bónda á Vatnaskørðum, har ein kúgv verður slaktað.
Gutti er eisini á Mjólkavirki búnaðarmanna, sum vit kenna sum MBM, har tey framleiða føroyskar ostar úr mjólkini frá kúnni.
Og so er Gutti eisini og vitjar grønmetisverkætlanina Næla í Bacalao í Havn, ið framleiðir føroyskt grønmeti á ein heldur øðrvísi hátt.
Meira prát og minni ævintýr
Pætur Marjunarson Dahl, ið er framleiðslustjóri av "Spískamarinum", vísir á, at hendan sesongin av væl umtóktu sjónvarpssendingini eitt sindur øðrvísi enn tær undanfarnu.
"Í hesum umfarinum er tað kanska meira prát og minni ævintýr, sum tað var nógv av í undanfarnu sesongunum," staðfestir Pætur Marjunarson Dahl.
Men tá tað er sagt, so líkist "Spískamarið" sær sjálvum, heldur Pætur Marjunarson Dahl.
"Tað er fólk, náttúra og matur, og tað broytist ikki."
Eitt, ið heldur ikki broytist í "Spískamarinum", er, at tað verður flent nógv og etið væl.
Vælgagnist.
Hvat: Spískamarið - í bø eg gangi (1/4)
Heitið Kúgvin
Hvar: Í sjónvarpinum
Nær: Í kvøld 27. oktober
Klokkan: 19.25