BankNordik 111 millónir í avlopi í triðja ársfjórðingi

BankNordik hevði 111 mió. kr. í avlopi eftir skatt í triðja ársfjórðingi.

Í fjør var úrslitið 194 milliónir, men tá stavaðu 83 milliónir frá søluni í Danmark.

Rakstrarúrslitið fyri niðurskrivingar gjørdist 144 mió. kr. samanborið við 125 mió. kr. sama tíðarskeið í 2021.

Niðurskrivingar á útlánum vóru afturførdar fyri 43 mió. kr., í fjør var talið 36 mió. kr. 

Útlanini vuksu 400 milliónir krónur og innlánini 800 milliónir.

Størri realkredittlán

Realkredittlánini vóru 100 milliónir krónur størri í triðja ársfjórðingi í ár enn í triðja ársfjórðingi í fjør.

BankNordik væntar, at nettoúrslitið í ár verður millum 140 og 170 mió. kr.

Fyrr í ár var mett, at úrslitið fór at vera 20 milliónir krónur betri.

Bankin sigur, at seinasta árið eru lánini til orkusparandi tiltøk, so sum umlegging frá oljufýringum til varandi orkuskipanir, ein triðing størri.

Harumframt hevur bankin fíggjað meira enn tvífalt so nógvar elbilar sum í sama tíðarskeiði í fjør.