Video: Til øll er fyri øll

Tey bæði byrjaðu at senda beinleiðis á Facebook undir koronutíðini, tá ið tey sótu í sóttarhaldi í eini íbúð í Havn eftir at hava verið uttanlands.

- Tá kom tankin, at vit kundu geva fólki okkurt, nú tá tey sótu heima og ikki kundu fara út ella til arbeiðis, sigur Sámal Hanni.

Tey gjørdu eina Facebooksíðu, sum tey kallaðu Til øll – Fyri øll og settu seg so í eina sofu at syngja andaligar sangir. 

- Satt at siga var eg ógvuliga bangin fyri at seta meg í eina sofu og syngja beinleiðis fyri fólki og ikki vita, hvør hugdi ella sá, men eg hugsaði, at hetta var ein serlig tíð, har fólk kanska sótu í einsemi ella vóru óttafull, so eg mátti seta meg sjálva til síðis einaløtu.

Og tey raktu plett, tí rættiliga nógv fólk tóku undir við tænastuni og settu seg at hyggja at teimum báðum, meðan tey sungu andaligar sangir. 

- Hetta er ikki eitt møti, men ein løta við nógvum sangi, onkrari bøn og okkurt stutt talað orð eisini, sigur Sámal Hanni.

Tey bæði hoyra ikki til nakra ávísa samkomu, men gera hetta av sínum eintingum. 

- Eg elski handa tankan, ikki at vita hvør hyggur, tí tað er ikki tað, hetta snýr seg um, sigur Sámal Hanni.

- Tað snýr seg um at raka menniskju og geva teimum eina góða løtu, leggur hann afturat. 

Samrøða við Kristu og Sámal Hanna í morgunsendingini

Í dag senda Krista og Sámal Hanni Lognberg annaðhvørt týskvøld beinleiðis á Facebook úr hølunum í Skopun. 

Facobooksíðan eitur Til øll – Fyri Øll og tú kanst finna hana HER

Sámal Hanni og Krista Lognberg

Tey bæði syngja vanliga heima hjá sær sjálvum, men tá ið tey senda, er tað úr øðrum hølum í Skopun.