Svøríki: Politisk runublaking

Í samrøðu við avísina Expressen hevur arbeiðsmálaráðharrin, Johan Pehrson úr flokkinum Liberalerna, lagt Svøríkisdemokratarnar, ið stuðla stjórnini, undir at vera “brún evja”.

Samrøðan snúði seg millum annað um “Tidö-avtaluna”, sum er sjálvt samstarvsgrundarlagið undir stjórnini.

Hetta fall ikki í góða jørð hjá Björn Söder, sum er ein av leiðandi politikarunum hjá Svøríkisdemokratunum.

- Um tú ætlar at verða sitandi í stjórnini, eigur tú at umhugsa, hvat tú sigur um sjálvt stjórnargrundarlagið og tær avtalur, ið eru gjørdar, skrivaði hann á Twitter.

Síðani eru tey í Liberelarna kropin til krossin, og í dag sigur floksskrivarin, Mattias Beckström Johansson, at Svøríkisdemokratarnir hava fingið eina umbering.