Síðsti valfundurin í Klaksvík í kvøld

Nú stundar til løgtingsvalið, sum verður hósdagin 8. desember. 

Valsendingarnar í Kringvarpinum eru nærum allar lidnar. Og í kvøld verður punktum sett á valdekningin, tá síðsti almenni valfundurin er á skránni. 

Evnini fyrstu tvey umførini eru ferðavinna og búskaparpolitikkur. Triðja og síðsta umfar verður eitt forfólkaumfar. 

Valfundurin verður í skúlanum á Skúlatrøð í Klaksvík. Fundurin byrjar eftir Dag og viku, tað vil siga kl. 19.30, og øll eru vælkomin at lurta og seta spurningar. 

Sjónvarpið sendir sjálvandi beinleiðis frá fundinum.