Sama fiskiveiðuavtala við Ísland

Sum árini frammanundan kunnu føroysk fiska botnfisk og uppsjóvarfisk í íslendskum sjógvi og íslendsk skip uppsjóvarfisk í føroyskum sjógvi.

Avtalan ásetir, at føroyska botnfiskakvotan verður 5.600 tons, harav upp til 2.400 tons av toski og upp til 400 tons av brosmu.

Føroyska lodnukvotan verður framhaldandi fimm prosent av heildarkvotuni, sum Ísland, Grønland og Noreg áseta, men tó í mesta lagi 30.000 tons.

Atgongdin at fiska svartkjaft og norðhavssild hjá hvørjum øðrum heldur fram, so londini kunnu fiska hesar kvotur í síni heild inni hvør hjá øðrum.

Av beinleiðis kvotu fær Ísland 1.300 tons av makreli frá Føroyum, og hetta er eisini óbroytt í mun til undanfarin ár.