Fleiri útihýst frá Twitter

New York Times skrivar, at millum hesi er Ryan Mac, sum arbeiðir hjá New York Times, og Drew Harwell frá Washington Post.

Journalistarnir hava ikki fingið nakra útgreinaða frágreiðing um, hví teirra Twitter-konto er stongd. Sagt verður bara, at teir hava brotið reglurnar fyri at vera á sosiala miðlinum.

Elon Musk skrivar á sínum Twitter, at reglurnar á Twitter eru galdandi fyri øll – eisini journalistar.

Blakað starvsfólk til hús
Síðani Elon Musk keypti Twitter, er hent eitt sindur av hvørjum.

Hann hevur millum annað blakað helvtina av starvsfólkunum til hús og lovað Donaldi Trump innaftur á sína konto, sum annars hevði verið stongd síðani álopið á Capitol Hill.

Mikudagin mistu 25 fólk, sum fáast við at siga almenninginum frá, hvar privatflogfør ferðast í heiminum, sína atgongd til Twitter.

Talan er um privat marglætisflogfør hjá fleiri milliardingum – millum annað hjá Elon Musk sjálvum.

ES ræðist Twitter-sensur
Tað fellur ikki í góða jørð í frælsa heiminum, at Twitter nú er farið undir at sensurera so hart. 

Millum annað sigur Vera Jourova, sum er ES-ráðharri fyri virðir og gjøgnumskygni, at nýggjastu átøkini hjá Twitter eru ræðandi. 

Hon vísir í einum boðum á júst Twiter á, at nýggjar reglur fyri sosialar miðlar koma í gildi í ES komandi ár.

Við nýggju reglunum verður lættari hjá ES at revsa fyritøkur, sum millum annað ikki liva upp til tey frælsiskrøv, sum ES krevur – eitt nú, tá talan er um sensur.