Nógvar fyritøkur á Jobmatch

Árliga Jobmatch tiltakið hevur seinastu tvey árini verið órógvað av koronufarsóttini, og tí tykist serligur áhugi vera fyri tiltakinum í ár.

"Eg haldi, at tað virkar sum um luttakararnir eru serliga spentir til Jobmatch í ár, nú tvey ár eru liðin, síðan teir stóðu andlit til andlit við tey vitjandi," sigur Katrin I. Gregersen, samskipari, í tíðindaskrivi.

Áhugin at vitja Jobmatch er eisini stórur, og longu nú eru fleiri bíleggingar komnar um sokallað JobPrát, har vitjandi kunnu bíleggja eitt prát við luttakararnar.

Endamálið við Jobmatch er enn sum áður at knýta samband millum føroyska arbeiðsmarknaðin og lesandi og útbúgvin í Føroyum og uttanlands. Talan er um fleiri fyritøkur og stovnar innan nógvar ymsar vinnugreinir, til dømis alivinnu, handverki, KT, heilsu, almennari fyrisiting og gransking.