Fyrsta skipaða spurnakappingin um kvæðamentan

Hvørjir flýddu saman við Sigmundi av Skúgvoynni til Suðuroyar? Hvønn lit hevði hesturin hjá Ebbe Skammelsøn? Og hvønn vildi Eirikur Jallur hava undir liðini á sær, um hann kom í vanda?

Soleiðis ljóða tríggir tilvildarligir spurningar í tveimum undankappingum um føroyskan dans, kvæði og kvæðamentan í útvarpinum. Átta dansifeløg eru við í kappingini.

Leygardagin tann 7. januar var nýggja spurnakappingin, "Tú manst vita frá mongum at siga", sjósett. Heitið er tikið úr øðrum ørindi í Brúsajøkli, sum ofta verður kvøðið.

Elin Maria Olsen og Jóhann Mortensen hava lagt spurnakappingina til rættis og samskipað hana. Rasmus Joensen og Jónleif Johannesen, sum vit kenna frá kvæðasendingum og dansi, hava hjálpt til at gera spurningarnar.

Harafturat koma tøkningarnir Høgni Fagraberg, Kári Annand Berg, Rúni Eysturlíð og Øssur Egholm, sum hava gjørt ljóðbrot og tikið upp.

Tey kvøða

Mynd: Bjarni Árting Rubeksen

Endadysturin verður á føstulávint

Spurnakappingin er gjørd lurtaravinarlig og er skipað við løttum og miðal torførum spurningum, so lurtararnir kunnu vera við.

Tað tykist, at lurtarar hava teir tikið væl ímóti spurnakappingini, tí afturboðanirnar eru mangar. 

Spurnakappingin er skipað við fýra undanumførum, tveimum hálvfinalum og eini finalu, sum verður føstulávintsleygarkvøld, sum er eitt av teimum stóru dansikvøldunum.

Tú finnur sendingina her.