Ákærdur fyri at koyra á gás við vilja

Tveir 19 ára gamlir dreingir eru ákærdir fyri brot á djóraverndarlógina, ferðslulógina og revsilógina, tí annar teirra koyrdi við vilja á eina gás á gongubreytini, so gásin doyði. Ein onnur gás slapp undan bilinum.

Hin drongurin filmaði hendingina við fartelefonini.

Hetta var á Sundsvegnum í Havn á summarmála í fjør.

Ákæruvaldið krevur, at bilførarin missir koyrikortið treytaleyst. Tað krevur eisini, at hvørgin teirra ákærdu sleppur at fáast við djór í eina tíð, sum rætturin ásetur.

Eisini harðskapur

Fyrivarni verður tikið um endurgjaldskrav.

Teir báðir eru eisini ákærdir saman við tveimum øðrum dreingjum fyri harðskap, tí teir skulu hava felt ein mann í miðbýnum í Havn sunnunáttina 24. apríl 2022.

Tann álopni langaði nakkan í vegin.

Eisini her er fyrivarni tikið um endurgjaldskrav.