Verjin vil hava skuldsetta mannin latnan leysan

18 ára gamli maðurin, sum er skuldsettur fyri drápsroynd í Norðdepli sunnumorgunin 14.juli, skal í Føroya rætt í morgin.

Verjin, Jógvan Páll Lassen, sigur, at hann fer biðja rættin lata mannin leysan. Ákærin fer at biðja rættin leingja varðhaldsfongslingina, sum skilst í fýra vikur. Politiið er ikki liðugt at kanna málið. Maðurin hevur verið í varðhaldi síðani 14.juli, tá hann varð tikin.

Noktar seg sekan

Varðhaldsfongslingin er longd fýra vikur einaferð. Tær fýra vikurnar eru farnar í morgin, og tí skal rætturin taka støðu til, um maðurin skal latast leysur nú, ella vera verandi í varðhaldinum. Maðurin noktar seg sekan í skuldsetingini.

Hann sigur seg einki minnast frá sunnumorgninum 14.juli, tá hann er skuldsettur fyri at hava stungið fýra fólk við knívi. Tá grundlógaravhoyringin var, avgjørdi rætturin, at maðurin skal persónskannast og mentalkannast.

Persónskanningin, sum Kriminalforsorgin gjørdi, er liðug. Mentalkanningin er ikki liðug enn.