Teldusníkar lata svenskar heimasíður aftur

Teldusníkar úr bólkinum, Anonymous Sudan, hava í dag gjørt álvara av hóttanum sínum um at gera seg inn á svenskar heimasíður.

Fleiri svenskar heimasíður eru í dag av hesi orsøk óatkomiligar, og millum annað er talan um fleiri stórar almennar tænastur, ið eru raktar.

- Vit biðja øll ósek fólk í Svøríki um umbering, men í dag leggja vit eina rúgvu av svenskum heimasíðum niður, skrivar teldusníkabólkurin á síni Telegram-rás.

- Vónandi hava tit gott tol, men vit noyðast altso at gera hetta, tí tit brenna koranir, siga tey í Anonymous Sudan.

Tað, at koranir eru brendar undir tiltøkum í svenska høvuðsstaðnum, Stockholm, hevur higartil eisini havt ta avleiðing, at Turkaland er afturhaldandi við at góðkenna Svøríki sum nýtt limaland í NATO.