Gildistíðin á veiðiloyvum skal leingjast eitt ár

Fólkaflokkurin hevur skotið upp at leingja gildistíðina á veiðiloyvum og fiskiloyvum í bólki fimm til 1. januar í 2035, tað er eitt ár.

Veiðirættindini hava somu gildistíð sum veiðiloyvið.

Fólkaflokkurin sigur, at støðug framgongd hevur verið í fiskivinnuni, síðani sjófeingislógin varð samtykt í 2019, tí fleiri nýggj skip eru komin, og tað hevur verið við til at gera flotan meira effektivan og orkuvinarligan.

Tað er týdningarmikið, at skipanin er trygg, og at allir aktørar vita, hvat teir hava at halda seg til, soleiðis atvinnan ikki kemur í somu støðu, sum var frá 2007 til 2019.

Tryggleiki hevur stóran týdning fyri íløguhugin og fíggingarmøguleikarnar, sigur Fólkaflokkurin.