Landsliðið brendi alt ov illa

Eftir at hava vunnið við tveimum málum mikukvøldið, taptu hondbóltsmenninir í dag við átta málum, 25-17.

Føroyar fylgdu hampuliga væl við í fyrra hálvleiki, men vóru aftanfyri við fýra í hálvleikinum, 14-10, og sum seinni hálvleikur leið, gjørdist munurin bara størri.

– Orsøkin til tað var fyrst og fremst vantandi effektivitetur framman fyri rumenska málinum, heldur Ingi Olsen, sum viðmerkti dystin í sjónvarpinum seinnapartin.

Hákun West av Teigum var aftur í dag føroyskur toppskjútti, hesaferð við fýra málum.

Føroysku hondbóltsmenninir spæla næstu ferð aftur á heimavølli, tá ið teir mikukvøldið 26. apríl taka ímóti Ukraina í Høllini á Hálsi í Havn. Til tann dystin er longu alt útselt!