Arbeiðsloysið framvegis minni enn eitt prosent

Arbeiðsloysið í Føroyum var 0,8 prosent í februar, ið svarar til 240 fulltíðararbeiðsleys. 

Tað skrivar Hagstovan á heimasíðu sínari.

Gongdin vísir, at arbeiðsloysið er støðugt minkað seinastu árini. Sama tíðarskeið í fjør var arbeiðsloysið eitt prosent. 

Í 2020 vaks arbeiðsloysið nakað, tá ið koronufarsóttin rakti, men er síðani minkað aftur.

Fleiri menn enn kvinnur vóru arbeiðsleysir í februar, 131 menn og 109 kvinnur.

26 langtíðararbeiðsleys

Av teimum 240 arbeiðsleysu í februar vóru 26 fólk langtíðarbeiðsleys. Tað merkir, at tey hava verið arbeiðsleys í meira enn eitt ár.

Seinasta árið er talið á langtíðararbeiðsleysum eisini minkað.

Minsta arbeiðsloysið er í Eysturoy og í Vágum, og tað er størst í Sandoy og Suðuroy. 

Arbeiðsloysið er minst millum tey 45-54 ára gomlu og størst millum tey 25-34 ára gomlu. 

175 arbeiðsleys í dag

Í dag eru 175 fólk skrásett sum arbeiðsleys í ALS, 80 kvinnur og 95 menn.

480 fólk fáa stuðul eftir fiskavirkisskipanini, 243 kvinnur og 237 menn.