Upp til sjey broytingar verða gjørdar

Håkan Ericson boðar frá broytingum undan venjingardystinum ímóti Norðurmakedónia mánadagin. 

Møguliga verða heili sjey nýggj nøvn í byrjanaruppstillingini, og helst verður onkur taktisk broyting eisini gjørd.

 - Vit gera onkra lítla taktiska broyting, tí hetta er sterkari lið, sum vit møta í morgin, sigur landsliðsvenjarin. Hann vil ikki avdúka, hvørjir spælarar verða skiftir út og inn, men tað er ikki óhugsandi, at bert ein framherji verður inni frá byrjan, so antin miðjan ella verjuketan fær ein mann afturat.

Høvuðsdentur tykist verða lagdur á, at royna aðrar spælarar enn teir, sum byrjaðu inni ímóti Moldova, men tað er greitt, at fleiri hava tørv á hvíld, eftir eina kappingarbyrjan heima í Føroyum, sum orsakað av nógva kavanum als ikki hevur gingið eftir vild.

Seinni í ár skal Føroyar spæla ímóti bæði Kekkia og Póllandi í undankappingini, og dysturin ímóti Norðurmakedónia skal eisini síggjast sum liður í fyrireikingini til hesar dystirnar, tá Føroyar óivað verða undir stórum trýsti.