Kommunurnar hava álit á landsstýrinum - enn

"Enn hava vit álit á, at rokningin fyri vallyftini hjá landsstýrinum ikki endar hjá kommununum". Tað sigur Tórbjørn Jacobsen, formaður í Kommunufelagnum nú landsstýriskvinnan í fíggjarmálum er komin við leisti fyri hvussu kommunurnar skulu fáa endurgjald fyri tær útreiðslur og mistu inntøkur, ið ætlanirnar hjá landsstýrinum hava við sær hjá kommununum.

Vallyftini skulu fíggjast og tí fer landið nú at taka meira inn í tilfeingisgjaldi frá ali- og fiskivinnuni. Men eisini í hesum føri endar ein partur av rokningini hjá kommununum. Kommunurnar skulu tí hava ein part av tilfeingisgjaldinum frá ali- og fiskivinnuni sigur landsstýrið. Men hvussu skulu hesir pengarnir deilast millum kommunurnar? 

Eitt er at tað verður trupult hjá kommununum at semjast um hvussu pengarnir skulu býtast, men eitt annað er at kommunurnar enn ikki vita júst hvussu nógvar pengar talan er um.  

Tey broyttu uppskotini eru borðin í Løgtingið og skulu helst til 1. viðgerð í hesi vikuni. Tað váttar Ruth Vang landsstýriskvinna í fíggjarmálum, fyri Kringvarpinum í dag.