- Tíðindi, mentan og ítróttur
Byggja fóðurflaka til íslendskt alivirki
JT Electric skal byggja ein fóðurflaka til íslendska alivirkið Háafell. Hann skal vera liðugur í august, skrivar Morgunblaðið.
Talan er um nýtt slag, sum JT Electric og Háafell hava ment saman.
Flakin er umhvørvisvinarligur, hann brúkar minni orku og hevur minni gang enn aðrir slíkir flakar, sigst.
Hann tolir stóra aldu, heilt upp í 11 metrar. Háafell er á Vestfirðunum.
Tekur 480 tons
Fóðurflakin skal taka 480 tons av fóðri. Hann verður eisini innrættaður at taka fimm tons av fóðri til rognkelsi. Tann fiskurin verður brúktur til at taka laksalýs.
Flakin kann brúka landstreym, og hann fer at hava battarí til streym.
Hann fóðrar við sjógvi í staðin fyri, at fóðrið verður blást út í ringarnar.
JT Electric boðaði frá í gjár, at fyritøkan broytir navn til GroAqua.