Koyrikortið verður talgilt

Nýggja appin, Skjáttan, sum millum annað hýsir talgildum koyrikorti, verður alment tikin í nýtslu fyrrapartin í dag.

Talgildu Føroyar og Fíggjarmálaráðið skipa fyri tíðindafundi klokkan 10.

Har fara Ruth Vang, landsstýriskvinna í fíggjarmálum, Dennis Holm, landsstýrismaður í samferðslumálum, og Andras Robertsson Marr, stjóri á Akstovuni, at greiða frá arbeiðinum at menna Skjáttuna.

Síðani fer landsstýriskvinnan í fíggjarmálum at taka appina alment í nýtslu.

Skjáttan er eitt nýbrot í føroyskari talgilding. Til dømis kunnu flestu prógv og loyvi frá almennum myndugleikum, stovnum og kommunum gerast partur av appini, siga Talgildu Føroyar.