NemID verður til MitID

Tann 30. juni 2023 letur NemID aftur. Eftir hetta ber ikki til at nýta NemID til at rita inn á danskar talgildar sjálvavgreiðslur. Tískil heitir Ríkisumboðið á allar borgarar, sum nýta NemID, um at fáa sær MitID, áðrenn NemID letur aftur.

Niðanfyri ber til at lesa, hvussu tú fært MitID.

Unn Danielsen og Beinta Müller frá Ríkisumboðinum

Beinta Müller og Unn Danielsen frá Ríkisumboðnum vóru í útvarpsstovuni og greiddu frá skiftinum frá NemID til MitID. Hoyr samrøðuna her:

MitID umvegis NemID

Um tú hevur eitt aktivt NemID, kanst tú sjálv/ur stovna tær eitt MitID, sum tú síðan kann nýta til at rita inn á danskar talgildar sjálvavgreiðslur. Hetta kann gerast umvegis www.mitid.dk/nemid

MitID við persónligari uppmøting á Ríkisumboðnum

Til ber eisini at fáa MitID á Ríkisumboðnum, um samleikatreytirnar kunnu lúkast. Ætlar tú tær at fáa MitID stovnað á Ríkisumboðnum, verður tú biðin um at bíleggja tíð umvegis teldupost ella telefon.