Óvist um tikið verður ímóti 13 milliónum

Nú skal leiðslan í Sjúkrahúsverkinum og landsstýriskvinnan í heilsumálum svara, um tey taka móti gávuni.

Tað var fríggjadagin í síðstu viku, at Margit Stórá, landsstýriskvinna í heilsumálum, fekk boð umvegis teldupost, at vinnulív í Klaksvík, Leirvík og Fuglafirði vildi lata ein MR-skannara til Klaksvíkar Sjúkrahús.

Í teldupostinum, sum Kringvarp Føroya hevur fingið alment innlit í, stendur, at  gávan er 13 milliónir krónur.
 
Tað er Petur Even Djurhuus, advokatur, ið umboðar vinnulívið. 

Hann skrivar, at vinnulívið leggur ymsar treytir við gávuni:

Millum annað at MR-skannarin skal til eina og hvørja tíð verða staðsetur á Klaksvíkar Sjúkrahúsi og nýtast á Klaksvíkar Sjúkrahúsi, og at Sjúkrahúsverk Føroya bindir seg til at seta MR-skannaran upp í hølum hjá Klaksvíkar Sjúkrahúsi og veita rakstrarfígging til dagliga nýtslu av skannaranum.

Margit Stórá, landsstýriskvinna í heilsumálum, og Steinar Eirikstoft, forstjóri í Sjúkrahúsverkinum, vilja kanna málið nærri, áðrenn tey siga, um tey vilja taka móti gávuni.