Royna nú aftur at loysa sáttmálatrætuna

Flogskiparafelag Føroya og Føroya Arbeiðsgevarafelag gera nú aftur eina roynd at loysa sáttmálatrætuna.

Partarnir hava seinasta samdøgrið, saman og hvør sær, arbeitt við, hvørjar broytingar skulu gerast í seminingsuppskotinum, sum Semingsstovnurin legði fyri partarnar í síðstu viku, og sum Flogskiparafelagið vrakaði í gjár.

Beint eftir lýsti Føroya Arbeiðsgevarafelag verkbann fyri flogskiparar hjá Atlantsflogi, sum hava støð í Føroyum, at koma í gildi 12. mai.

Terje Sigurðsson

Terje Sigurðsson, semingsmaður.

Kanska nýtt semingsuppskot

Terje Sigurðsson, semingsmaður, sigur í stuttari viðmerking við útvarpið, at partarnir nú sita hvør sær og arbeiða við eini loysn, sum møguliga endar við nýggjum semingsuppskoti. 

Semingsstovnurin var boðsendur fyri páskir, tá samráðingarnar millum flogskiparar og arbeiðsgevarafelagið, sum Atlantsflog er í, slitnaðu.

Sáttmálin hjá flogskiparunum, sum var, kom í 2019. Hann vardi til 1. apríl í ár.