Tvær ferðir so nógvir bilar, men nógv færri ferðsluóhapp

Samstundis sum akførini eru vorðin meira enn dupult so nógv, eru ferðsluóhappini minkað tveir triðingar.

Hagstovan sigur, at síðani 2000 eru komin meira enn 23.000 fleiri akfør í Føroyum.

Tey vóru 19.000 1.januar 2000, og tey vóru góð 42.000 1.januar í ár.   

Tvey fólk fyri hvønn persónbil

Í 2000 vóru 3,2 fólk fyri hvønn persónbil, í ár eru tey tvey fólk. Men hóast bilarnir eru nógv fleiri nú, eru óhappini á vegunum nógv færri.

Fyrst í hesari øldini vóru ferðsluóhappini 1.200-1.300 um árið.

Nú eru tey farin langt niður um 500. Tey vóru 461 í fjør.  Í 2010 vóru tey 410, vísa tøl hjá løgregluni.

Nógvi færri ferðsluskaðar

Fólkaskaðar í ferðsluni eru eisini nógv færri nú. Teir vóru millum 60 og 70 um árið fram til 2008.

Síðani eru teir millum 20 og 30 um árið. Tvey fólk doyðu ferðsluni í 2022 og eitt fólk í 2021. Eingin doyði í 2020. 

Og færri vóru ákærd fyri rúsdrekkakoyring eftir 2007. Men tað talið er vaksið aftur seinastu árini.