Tjúgu lið kappast um FM

Tjúgu lið úr fýra feløgum skulu kappast um føroyameistaraheitið, tá FM í estetiskum fimleiki verður í Havn um vikuskiftið

FM í estetiskum fimleiki verður um vikuskiftið, og 20 lið eru við

Mynd: Føroya Fimleikasamband

Símun Christian Olsen

04.05.2023 - 11:23

Hulda Meliora, Lyra og Hulda fara um vikuskiftið at kappast um føroyameistaraheitið í estetiskum fimleiki hjá kvinnum.

Beinhørð kapping var ímillum Huldu Melioru úr Havnar Fimleikafelag og Lyru úr Ljósinum, tá tær báðar steypakappingarnar vóru fyrr í ár. Tá vann Hulda Meliora, men somikið lítil munur var á liðunum, at alt kann henda sunnudagin, tá finalurnar vera.

Afturat teimum trimum liðunum við kvinnum skulu 17 lið í øllum aldursbólkum í FM-kapping í høllini á Hálsi. Tey umboða Havnar Fimleikafelag, Ljósið, Støkk og Klaksvíkar Fimleikafelag.

Undankappingin byrjar leygardagin klokkan 13:00 og sunndagin klokkan 13:00 eru finalurnar. KvF sendir frá finalunum sunnudagin.