Spyr um klædnareglur í Vestmanna skúla

Tekur landsstýrismaðurin í barna- og útbúgvingarmálum undir við metingini hjá skúlastjóranum í Vestmanna skúla, um at gentur í nalvablusu órógva arbeiðsumhvørvið á skúlunum kring landið?

Tað vil Liljan Weihe, tingkvinna fyri Tjóðveldi, vita, og hevur sett landsstýrismanninum í barna- og útbúgvingarmálum grein 52 spurning um klædnareglur í fólkaskúlanum. 

Hon spyr millum annað, um landsstýrismaðurin metir, at tað eru gentur og kvinnur, sum sjálvar hava ábyrgdina av, hvussu onnur reagera uppá teirra kropp ella klæði? Og um tað er í samsvari við fólkaskúlalógina, at einstakir skúlastjórar - og ikki skúlastýrini - gera slíkar reglur á fólkaskúlum kring landið?

Liljan Weihe

Liljan Weihe, løgtingskvinna, spyr landsstýrismannin í barna- og útbúgvingarmálum um klædnareglur í Vestmanna skúla. (Mynd: Bjarni Árting Rubeksen)

Stuttur niðurdeilur og niðurringað blusa

Um so er, at slíkar reglur verða settar í verk, hvør skal so gera av, hvussu stuttur ein niðurdeilur kann vera, ella hvussu niðurringað ein blusa kann vera? Og um skúlin hevur heimild til at seta tiltøk í verk, um slíkar reglur ikki verða hildnar?

Orsøkin til spurningin er, at nýggjar klædnareglur eru settar í gildi í Vestmanna skúla, sum millum annað hava við sær, at gentur ikki kunnu koma í skúla í nalvablusu.

Tá kjak um slíkar klædnareglur var í Danmark fyri nøkrum árum síðani, greiddi ein granskari í kyni, útbúgving og arbeiðsmarknaði frá, hvussu slíkar reglur kunnu vera oyðileggjandi fyri genturnar, sum tað gongur út yvir.

Djóni Nolsøe Joensen

Djóni Nolsøe Joensen, landsstýrismaður í barna- og útbúgvingarmálum. (Mynd: Bjarni Árting Rubeksen)

Skal svara um 10 yrkadagar

Tær fara at kenna seg skeivar og átaka sær skuldina og skommina av, at “onnur” ikki fáa arbeiðsfrið fyri teimum skrivar løgtingskvinnan í grundgevingunnum fyri spurninginum.

Djóni Nolsøe Joensen, landsstýrsismaður, skal svara í seinasta lagi 10 yrkadagar eftir dagfestingina av spurninginum, sum er 4. mai.