Nýggj bókasavnslóg næsta ár

Føroyar hava fingið nýggja bókasavnslóg. Hom kemur í gildi 1.januar 2024.

Uppskotið hjá Sirið Stenberg, landsstýriskvinnu, var samtykt í gjár.

Galdandi bókasavnslóg er frá 2001.

Í nýggju bókasavnslógini er staðfest, at allar kommunur og allir skúlar í landinum skulu veita bókasavnstænastur. 

Ljóðbøkur lænast á heimasíðuni

Eitt av størstu frambrotunum í nýggju lógini er, at føroyskar ljóðbøkur kunnu lænast á heimasíðunum hjá bókasøvnunum. Og tað verður longu beint eftir summarfrítíðina. 

Tær 500 ljóðbøkurnar, sum Ljóðbókatænastan hjá Landsbókasavninum hevur gjørt til blind og sjónveik, kunnu seljast rættindahavarum, sum ætla at geva tær út. 

Tá ljóðbøkurnar vera givnar út til almenningin, kunnu tær eisini lænast á bókasøvnunum.

Universitetsbókasavnið styrkt

Nýggja lógin hevur eisini ásetingar um eitt bókasavnsráð.

Og universitetsbókasavnið á Fróðskaparsetri Føroya verður styrkt fyri at tryggja granskarum, undirvísarum, lesandi og øðrum neyðuga atgongd til tilfar og bókasavnstænastur.