Fróðskaparsetrið noyðist at húsast í fyribilsloysnum

Kampuss, sum skal byggjast á Frælsinum í Havn, verður væntandi liðugur í 2031-2032, um politiskur vilji og fígging eru.

Men longu næsta summar skal Fróðskaparsetrið flyta úr einari hædd í Sjóvinnuhúsinum, har ein stórur partur av Setrinum í løtuni húsast. Restin av Fróðskaparsetrinum skal flyta úr Sjóvinnuhúsinum í 2025 og møguliga seinni. 

Tí verður arbeitt við at finna eina loysn at hýsa Setrinum, sum er ein fyribils skrivstovubýlingur á Frælsinum, ella har á leið, og Eirargarður. 

Tað sigur Djóni Nolsøe Joensen, landsstýrismaður í skúlamálum, í svari til Anniku Olsen, løgtingskvinnu.

Byggja kampuss fyri 1,2 mia. kr. 

Heildarætlanin um kampuss á Frælsinum í Havn umfatar tríggjar bygningar, 20.000 fermetrar, og 8.500 fermetrar skulu høvuðsumvælast.

Haraftrat kemur parkeringskjallari.

Kostnaðurin nú er 1,2 milliardir krónur.

Djóni Nolsøe Joensen, Breddin

Djóni Nolsøe Joensen, landsstýrismaður, sigur, at aðalorðaskifti um Fróðskaparsetrið verður í løgtinginum í heyst.